Día da Poesía "Eduardo Rey Moure" 2025

 

E por fin o 28 de marzo, a auga, tema ao que se adicou esta edición o Día da Poesía, permitiu unha mañá fermosísima que nos deixou gozar da música e a poesía en toda a súa plenitude.

Como xa ven sendo tradición, todos os centros educativos da comarca de Sarria así como a Escola Municipal de Música  estiveron presentes nesta xornada, na que houbo moita poesía e, sobre todo, moita música. Todos os participantes, dende os mais pequerrechos ata os mais profesionais, fixeron un gran esforzo por dar o mellor de sí para facer unha celebración amena, dinámica e moi participativa. O acto estivo dirixido polo noso excompañeiro Xurxo Souto que actuou como mestre de cerimonias.

Foi ademais un día de reencontros con excompañeiros e exalumnos, todos unidos arredor da poesía e da memoria de Eduardo. Sempre é un pracer ver como os antigos alumnos vanse abrindo camiño no mundo laboral coma no caso de Eros López, quen tan ben o contou na súa crónica de El Progreso o que aquí aconteceu e tan ben o retratou na galería de imaxes deste evento.

A poesía é para lela, cantala e, sobre todo, gozala e lembrala. Tedes xa na biblioteca a vosa disposición o escolma de poemas recitados por todos os participantes neste acto que agardamos teña continuación na próxima edición.

Acudimos á entrega do XXVIII Premio de novela San Clemente

O 25 de marzo acudimos a Santiago para participar na entrega dos premios da 28ª edición do Premio literario San Clemente, organizado polo Instituto IES Rosalía de Castro de Santiago de Compostela. Os seis alumnos representantes do IES "Gregorio Fernández" participaron como xurado deste certame a prol da cultura literaria que, ao mesmo tempo, serve para fomentar o hábito lector entre o alumnado. Nesta edición os premios foron para Antón Riveiro Coello por Hotel Carioca na categoría de lingua galega, Alejandro Zambra por Literatura infantil na categoría de lingua castelá e Maggie O’Farrell por El retrato de casada en lingua estranxeira.

Foi unha actividade especialmente emotiva presidida polo  Conselleiro de Educación da Xunta, quen destacou que os premios son fallados polos estudantes de distintos institutos galegos, de Madrid e incluso de Francia, Inglaterra e Alemaña, o que fai que sexan “uns galardóns especiais ao amosar que temos unha mocidade lectora que goza coa literatura”. 

O acto rematou cunha cena no Hostal dos Reis Católicos, onde tivemos a oportunidade de compartir mesa cos  autores premiados e charlar con eles de tú a tú. Foi unha xornada preciosa que nos fixo sentir a proximidade de autores de primeira liña e nos animou a todos os participantes a seguir lendo.

Podedes ler e escoitar mais  o publicado sobre esta edición do premio picando en XXVIII Premio San Clemente, La Voz de Galicia, El Correo Gallego e Radio Galega

Dende a nosa biblioteca queremos agradecer o convite feito por Marta Gende do IES Rosalía de Castro a participar tan activamente nesta actividade e ao noso alumnado tan apaixoado pola lectura e as actividades culturais.

Visita do profesorado alemán á nosa biblioteca

 

    Recentemente tivemos o pracer de coñecer a tres profesores do Gymnasium Waldkraiburg: Daniel, Thomas e Michael. O motivo da visita foi, ademáis de coñecer o noso centro, preparar a visita dalgunhas das súas alumnas que terá lugar o vindeiro mes de maio como parte do proxecto Erasmus+.

    Os tres profesores visitantes mostraron gran interese pola nosa biblioteca e todos os proxectos de fomento da lectura nos que estamos inmersos. Foi un encontro moi cordial no que intercambiamos puntos de vista sobre o ensino, a lectura e as distintas formas de traballar nos nosos respectivos centros de ensino.

Arte na biblioteca

 

A nosa biblioteca é ademais territorio das artes, e por iso temos unha nova exposición sobre as mesas da biblioteca, unha selección de obras de arte do Parlamento de Galicia, agasallo desta institución.

Achégase o 21 de marzo, Día da poesía

 

Temos xa no expositor un bo feixe de libros de poesía para ir gozando dela mentres se achega o 21 de marzo, Día da poesía, no que novamente lembraremos ao noso compañeiro Eduardo Rey Moure, quen impulsou a iniciativa de xuntarnos todos os centros da comarca na praza da vila de Sarria para celebrar a poesía. Nesta edición os poemas xirarán en torno á temática da auga e agardamos pasar outra xornada estupenda recitando, cantando, musicando e escoitando poemas en galego.

Premiados no Concurso "Inspírate en Castelao"

 

 A entrega de premios dos concursos celebrarase o mércores 19 de marzo ás 11:10 na entrada do edificio 100.

Ademais, podedes ver os debuxos premiados na exposición da mesa da biblioteca. Afortunadamente temos uns grandes artistas entre o noso alumnado.

23 de febreiro: Día de Rosalía

 Un ano más, o traballo en común para conmemorar o Día de Rosalía fixo que entre todos fixeramos moitas cousas pequenas para conmemorar algo moi importante para todos nós, a figura e a obra da gran Rosalía de Castro. As actividades adaptáronse ao seguinte programa:

No Instagram da biblioteca tedes mais fotos e vídeos destas actividades. 

Entretanto, quedámonos cos bos momentos que pasamos creando, debuxando, xogando e cantando en torno a Rosalía.

2025: Ano Castelao. Exposición e concurso de ilustracións

 

    Este 2025 conmemórase o 75 aniversario do pasamento do gran Castelao, e con este motivo dende o Equipo de Dinamización Lingüística e a biblioteca preparamos unha pequena mostra arredor da súa figura expoñendo as obras dun facsímil das súas ilustracións para o álbum Nós.

    En primeiro lugar, o alumnado tivo que buscar información agochada na biblioteca sobre aspectos relacionados coa vida e obra de Castelao para logo analizar as ilustracións e os comentarios que as acompañan no material exposto nas mesas da biblioteca. Pero o saber non remata aí, polo que ademais todo o alumnado do IES Gregorio Fernández pode demostrar as súas dotes artísticas tomando como inspiración as ilustracións orixinais de Castelao para crear as súas propias, coas que faremos unha nova exposición, na que haberá premios para os mellores. Non te demores, agardamos as vosas obras na biblioteca ata o 7 de febreiro.

Esta exposición coincide no tempo co 30 de xaneiro, Día da Ilustración, elemento tan presente na nosa biblioteca. Sabiades que nestes momentos os libros mais emprestados son determinados libros ilustrados?

Teatro en inglés e paseo polo arte urbán lucense

 

Comezamos o 2025 de xeito activo e cultural, acudindo á obra de teatro en inglés "Derailed" da compañía Face2Face no auditorio Gustavo Freire de Lugo. A continuación, aproveitamos para facer unha visita guiada, tamén en inglés, pola arte urbana presente en moitas paredes de Lugo en forma de graffiti, un tesoro agochado co que adentrarnos en novas manifestacións artísticas. Nesta ocasión, o departamento de inglés organizou a actividade para o alumnado de 3º, 4º de ESO e 1º de Ciclos Formativos, unha experiencia estupenda coa que empezar o segundo trimestre.

"Pilgrim Spirit. Elías Valiña and the Revival of the Camino 1959-1989"

 

A nosa biblioteca acolleu a presentación da edición do libro sobre Elías Valiña do escritor Luis Celeiro, quen estivo acompañado pola traductora canadiense residente no Cebreiro Laurie Dennet co gallo do 35 cabodano de Elías Valiña Sampedro.

O alumnado de 1º dos ciclos formativos de administración e xestión e de mecatrónica industrial puideron coñecer de primeira man a importancia da figura de Elías Valiña na consolidación do Camiño de Santiago. Ademais, puideron escoitar á escritora Laurie Dennet dar o seu discurso en inglés, o cal resultou moi enriquecedor.

Esta actividade foi promovida pola Asociación de Peridistas e Escritores do Camiño de Santiago (Apecsa) e desde o comezo contou coa nosa colaboración. Benvidas sexan as iniciativas que promoven a cultura e a lectura!

Agradecemos ademais os seis exemplares da obra doados e que pasan a formar parte da colección da biblioteca de libros relacionados co camiño de Santiago.