Olladas en lila contra a violencia de xénero

 

Novamente, o 25 de novembro xa está aquí e por desgraza segue sendo necesario decir NON á violencia de xénero.

Na entrada do instituto podedes ver a selección de materiais relativos ao tema que fixemos dende a biblioteca entre os que se atopan moitas novidades por descubrir.

O alumnado de Adultos elaborou ademais carteis que se poden ver no tendal que colga do teito, porque o 25 de novembro non hai nada que celebrar pero moito que reivindicar de cara á igualdade.

Colorido tendal filósofico

 O 17 de novembro conmemórase o "Día da Filosofía" e con este motivo a profesora Patricia Coucheiro elaborou nas súas clases de Filosofía de 4º de ESO e 1º de Bach camisetas con frases de filósofos ou filósofas recoñecidos para facernos reflexionar sobre a importancia da filosofía na nosa vida cotiá.

De cada unha das camisetas prende unha etiqueta alusiva ao autor ou autora da frase que está estampada cunha breve reseña explicativa.

Noraboa por este gran traballo que visibiliza o moito que se fai nas nosas aulas para intentar achegar o coñecemento ao alumnado.

Project: Painting literature

 

    Recentemente, e con motivo do 24 de outubro, Día da biblioteca, tivo lugar unha nova experiencia na que se implementou este espazo como biblioteca creativa. 

    O alumnado de 1º de Ciclo Medio de Xestión Administrativa e de 1º de Ciclo Superior de Administración e Finanzas participou durante a clase de inglés no proxecto "Painting literature" no que se fusionaron cadros clásicos relacionados coa lectura con revistas en inglés dos anos 90 para crear orixinais e novas obras utilizando a técnica do collage.

     Ademais de aprender en inglés, tal e como se pode ver no vídeo, aproveitamos para montar unha pequena exposición enriba das mesas da biblioteca coa esperanza de que non só os participantes na actividade aprendan sobre pintura e artes varias, senón que tamén os nosos usuarios se beneficien da nosa particular biblioteca creativa.

O terrorífico Samaín do 2022 xa está aquí

 

Le, fai a túa cabaza e xoga se te atreves! Hai truco ou hai trato?

Na nosa biblioteca sempre hai algo agochado. Achégate!

24 de outubro: Día da biblioteca

O 24 de outubro é o "Día da Biblioteca" e con este motivo todo o alumnado de ESO de Plástica elaborou estos fermosos carteis que podedes ver na entrada do edificio da ESO. Pronto se elexirán aos mellores. Achegádevos e, sobre todo, aproveitade para vir á biblioteca e descubrir todo o que agocha!

Tras unha difícil deliberación por parte dun xurado formado por cinco profesoras do instituto, os alumnos gañadores aos  mellores carteis do "Día da Biblioteca" foron: en 1º de ESO Antía Fernández López, Nerea Pérez López e Maikel Rodríguez Seijas, en 3º de ESO Brais Castro Pereiro, Carla Díaz Rodríguez e Nicolás Vera Arenciabia e en 4º de ESO Meryem Dallahi. Noraboa a todos, non deixedes nunca de crear e de imaxinar e agardamos vos guste o agasallo que vos enviamos con todo o noso agarimo dende a bilioteca.

 

Obradoiros de caligrafía creativa

 

"Escribir a biblioteca escolar" é o lema deste curso elixido pola Asesoría de Bibliotecas Escolares. Así que prestando atención á importancia da boa letra e da creatividade, consideramos que un novidoso xeito de celebralo podería ser cos obradoiros de Lettering que o 14 de outubro tiveron lugar na nosa biblioteca da man da experta viguesa Mónica Martínez do Estudio Sopa de Letras 

Mónica ensinou ao alumnado de ESO que cursa Plástica os trazos básicos para iniciarse na arte do Lettering, coñeceron de primeira man os materiais usados, practicaron nos caderniños de caligrafía e grazas ao gran esforzo e atención dos aprendices vimos que os resultados foron moi bos e que xa escribiron cousiñas moi fermosas. 

Esta actividade foi organizada pola nosa biblioteca en colaboración co departamento de plástica que seguro que conseguirá que todo se escriba mellor e forma parte das actividades para conmemorar o próximo 24 de outubro, Día da Biblioteca Escolar.

Descubrindo Sarria en inglés

 

O 11 de outubro o alumnado dos primeiros cursos dos ciclos de Xestión Administrativa e de Administración e Finanzas tiveron ocasión de descubrir Sarria dun xeito diferente. Nesta ocasión fixémolo grazas á visita guiada  en inglés feita pola guía turística sarriana Silvia Mondelo.

Silvia fixo un percorrido centrado na historia de Sarria prestando especial atención ao tecido empresarial da vila e a algúns dos seus emprendedores e personaxes relevantes. Deste xeito, puidemos descubrir a historia dos chocolateiros Matías López e Venancio Vázquez, das imaxes e  técnicas de marketing usadas por Matías López ou do gran legado que este deixou aos sarrianos. Tras pasar pola rúa dos anticuarios rematamos esta agradable visita diante do mural da escritora Xela Arias.

Foi un paseo moi agradable e didáctico no que a lingua inglesa serviu como canle de comunicación e de achegamento ao noso pobo.

Plataforma de empréstito de libros dixitais

 

Todo o profesorado e alumnado novo no instituto pode pedir á coordinadora da  biblioteca (Raquel Arias)  as súas credenciais para acceder á plataforma de empréstito de libros dixitais e audiolibros

Día das Escritoras 2022

 

O próximo 17 de outubro celébrase "O día das escritoras"  e con este motivo propoñémosvos acercarvos á exposición que temos na entrada da biblioteca botándolle unha ollada a libros escritos por mulleres. Sabiades que hai moitos mais libros escritos por homes que por mulleres na nosa biblioteca?

Bibliotour 2022 - Benvida ao alumnado de 1º de ESO

 

O alumnado de 1º de ESO acudiu á primeira sesión de Bibliotour deste curso 2022-23. Tiveron ocasión de descubrir a biblioteca, saber que existen moitos fondos que lles poden interesar, como xogos, películas e libros informativos. Ademais, formaronse como usuarios e aprenderon a facer búsquedas tanto virtuales como reales. Foi un pracer recibilos, e agardamos velos por aquí con moita frecuencia.