Libros para o verán

 

Como cada xuño, a biblioteca lémbravos que non hai bo verán sen libro na man, así que emprestamos ata setembro!

Non o deixedes pasar, achegádevos e levade para ler. No expositor puxemos algunhas recomendacións moi variadas coas que pasar mellor as vacacións.

Bo verán sempre con boas lecturas!

Letras Galegas 2026: Actividades en torno a Begoña Caamaño

 

Comezamos o mes de maio quentando motores coa exposición da obra de Begoña Caamaño, a quen este 2026 está adicado o Día das Letras Galegas. Complementamos a mostra cos carteis enviados pola Consellería e que serviron de base para o concurso "Descubrindo a Begoña Caamaño" no que participaron tanto alumnado coma profesorado, os cales fixeron un gran esforzo por ler, averiguar e ser os mais rápidos en conseguir os ansiados premios.

Ademais, elaboramos a postal conmemorativa para agasallar non so ao persoal do centro, senón tamén aos peregrinos que cruzan a nosa vila aos que explicamos que  o 17 de maio é a nosa gran festa da Lingua e aos que falamos de Begoña Caamaño. Toda unha gran experiencia de comunicación e extensión cultural!

Día do Libro 2026

     Como cada ano, o 23 de abril é para celebrar ao grande. Nesta ocasión, na entrada do edificio principal temos unha gran árbore engalanada con minilibros creados polo alumnado da ESO, cheos de creatividade e boas historias. 

   

Ademais, habilitamos un panel que leva por título "Libros que devoramos. Libros que adoramos", onde os distintos membros da comunidade educativa van deixando as súas recomendacións lectoras. Achégate á biblioteca, pide un post-it e contribue a enchelo.

   

Primavera, poesía e ovos de Pascua

 

As ideas e a creatividade non deixan de bulir. Este curso dende a biblioteca e o Equipo de Dinamización Lingüística celebramos a primavera e o Día da poesía organizando un concurso de ovos pintados, no que o alumnado amosou todo o seu talento e imaxinación.

Os ovos presentados ao concurso están acompañados por pequenos poemas e expostos nunha fermosa árbore que decora a entrada do instituto, converténdose nun punto de encontro cheo de vida e inspiración.

Parabéns aos propulsores desta gran iniciativa que será a base de mais actividades relacionadas co libro e a lectura.

Exposición de fotos: Os últimos 20 anos da nosa biblioteca

Mais de setenta fotografías compoñen a exposición que está instalada nas mesas da primeira sala da biblioteca e que fan un percorrido polos últimos 20 anos da nosa biblioteca dentro do Plan de Mellora de Bibliotecas Escolares da Consellería de Educación. 

Foron moitas as actividades feitas ao longo dos últimos vinte anos co fin de impulsar a lectura, a escritura e a cultura e a educación.

Con esta mostra pretendemos ademais aportar o noso graniño de area á celebración dos 50 anos do IES Gregorio Fernández.

Achégate e búscate. Seguro que atopas a alguén coñecido!

Día da poesía 2026

 

 

     Un ano mais celebramos o Día da poesía que con tanta ilusión comezou o noso compañeiro Eduardo Rey Moure. Os trece centros de ensino da comarca de Sarria participaron nun acto conxunto na Praza da Vila  con música, poemas e ata lingua de signos. Nesta edición a temática foi a poesía relacionada co monte, e por isto a vaga de lumes do pasado verán estiveron moi presentes. Podedes ver mais imaxes e unha moi boa crónica do acto na publicación do diario El Progreso.

    Dende a biblioteca participamos activamente na súa organización e congratulámonos de ver o esforzo de tantos centros educativos e de tantas persoas para que cada ano a implicación sexa maior e a poesía se sinta dun xeito tan profundo. 

    

    Invitámosvos a achegarvos á nosa biblioteca e descubrir a poesía do expositor, onde temos poesía por un tubo. 

       

Día de Rosalía 2026

 

A entrada do noso instituto volveuse encher de Rosalía en forma de versos, bolsas, cores, chapas, música, proxeccións e unha pequena selección de libros coa obra da nosa poeta mais universal: Rosalía de Castro. 

Benvidas sexan todas as actividades que axudan a difundir lectura, escritura e creatividade nas súas formas mais variadas veñan de onde veñan, porque Rosa Lía tamén lía.

Obradoiros de xogos

Achégate os martes no recreo á biblioteca e participa no obradoiro de xogos da man das profesoras Lucía e Pilar, un bo xeito de descubrir novos xogos e novos compañeiros nestas mañás de inverno.

Novidades do 2026

 Como cada xaneiro, acaban de chegar as novidades que deixastedes na caixa dos desexos no 2025, así que achegádevos á biblioteca e comprobade se xa están dispoñibles para o empréstito.

Visita ás instalacións da Casa da Cultura de Sarria

O 22 de xaneiro, alumnado de CS de Administración e de Mecatrónica Industrial visitou as instalacións da Casa da Cultura de Sarria. Grazas á visita guiada feita pola bibliotecaria Miriam Alonso da BPM Camilo Gonsar de Sarria, puidemos descubrir o salón de actos, as dúas salas da biblioteca, a aula Cemit e o arquivo histórico, onde atopamos algunha sorpresiña inesperada.

Foi unha visita realmente amena e agradable que se enmarca dentro das colaboracións entre a Biblioteca Pública de Sarria e a nosa biblioteca, un pequeno gran paso para que todos os veciños poidan non só acceder senón gozar dos moitos servizos gratuitos que a biblioteca pon a nosa disposición. Continuaremos colaborando e tecendo redes!

Durante a visita estivemos tamén acompañados pola concelleira da área de educación do Concello de Sarria Geni Valcárcel.