Esta mañá, durante o recreo, o clube de lectura xuvenil do noso centro -"Ler de Lar"- deu comezo ás súas actividades. Hoxe foi un grande día para os/as lectores/as do IES "Gregorio Fernández": o primeiro clube de lectura do alumnado tivo a súa primeira reunión!
Para comezar a súa andaina, o clube "Ler de Lar" deu conta da lectura do maravilloso e fascinante libro "Jules Verne e a vida secreta das mulleres planta" (Xerais, 2015) unha archipremiada obra da escritora Ledicia Costas (Vigo, 1979).
A conversa resultou moi animada e interesante. Con seguridade que os "Huesitos" que paparon os/as nosos/as lectores/as terían que ver no asunto...! Fora de ironías, non fixo falta moito zucre para avivar a conversa xa que os/as asistentes ofreceron a súa aguda e intelixente mirada sobre o contido do libro.
Moitos coincidiron no feito de que a lectura do texto resultou moi amena e intrigante, salvo polo inicio do libro, do que algún dixo que era "demasiado longo e pouco animado". Tamén houbo referencias ás personaxes do libro. Pierre centrou todas as miradas e intereses, aínda que tamén se pronunciaron voces a favor de Violeta e houbo unha mención á maestría coa que a escritora describiu as nepheas, uns seres que quedan perfectamente descritos e que logo resultaban moi semellantes no maxín dos/as lectores/as á propia ilustración que deles contén o libro.
En definitiva, a conversa resultou moi amena e os profesores que organizan o clube (Esther F. e Lois) ficaron moi abraiados coas reflexións e reseñas que o noso clube é capaz de desenvolver. Foi moi positivo comprobar a madurez dos comentarios e apuntes de todos/as a cerca desta primeira lectura. Vaia maneira de comezar!! Este clube promete!!
Nesta avaliación, agárdanos a novela gráfica "Aquí vivió". Agardamos que o nivel se manteña! Polo momento, imos repoñendo as chocolatinas...!
Suscribirse a:
Enviar comentarios (Atom)
No hay comentarios:
Publicar un comentario