Este blog non publicará comentarios contra a dignidade das persoas ou do seu traballo.

Biblioteca "Fiz Vergara Vilariño"

miércoles, 30 de septiembre de 2020

Voltamos con moitas ganas e moito protocolo

Por fin voltamos. Ilusionados, con ganas e con moita precaución. Moito voltaron as cousas desde marzo de 2020. Falta alegría, falta ruido e falta xentiña na biblioteca. Aínda así, seguimos abertos e accesibles, non o dubides. Entretanto, idevos familiarizando co Protocolo de acceso e uso da biblioteca para este curso: 1) A biblioteca poderá ser usada ata o 50 % do seu aforo. Excepcionalmente, se fose posible polo tamaño da mesma, o equipo directivo pode ampliar ou reducir o aforo sempre que se cumpran as condiciones de seguridade axeitadas e a distancia do alumnado. 2) O aforo da biblioteca é de 16 persoas sentadas e 4 de pé e en movemento. Aforo total: 20 persoas. 3) O acceso realizarase pola porta de entrada tradicional da biblioteca. 4) O alumnado debe hixienizar as mans antes e despois da estancia na sala. 5) Para solicitar un libro en empréstito os usuarios deberán dirixirse á ventá de acceso á biblioteca. Non se poderá usar a porta da oficina onde estará o profesorado do equipo de biblioteca para realizar empréstitos. 6) Ao rematar, os usuarios da biblioteca hixienizarán os postos que teñan ocupado. O profesor encargado nese momento botará o produto para desinfectar e os usuarios limparán o posto co papel. 7) A saída da biblioteca farase pola porta que da ao exterior do centro para evitar que coincidan usuarios que entran e saen da biblioteca. Circularase pola dereita. 8) O préstamo de libros ou outro material realizarase de xeito habitual aínda que o devolto deberá permanecer en caixas identificativas e illadas como mínimo catro horas antes de volver aos andeis. 9) Evitarase o uso de xogos de mesa e materiais semellantes cando implique un uso compartido mentres dure a situación excepcional. 10) O uso da máscara é obrigatoria en todo momento. 11) Ventilaranse os espazos da biblioteca coa maior frecuencia posible e como mínimo 15 minutos ao inicio, no lecer e ao final da xornada. 12) Para o uso da biblioteca durante as clases, o profesorado correspondente solicitará cita previa anotándose no caderno que estará na oficina da biblioteca.; sen esquecer que no uso do material e equipos compartidos hai que hixienizar as mans antes e despois. 13) Os ordenadores só poderán usarse con fins educativos e os usuarios deberán hixienizar os protectores de teclado. 14) Organización de espazos e tempos: O obxectivo das seguintes medidas é a non aglomeración de persoas para garantir as medidas de distanciamento físico interpersoal. Por isto, o horario de empréstito e acceso libre para o alumnado durante os recreos será:  1º ESO: Luns  2º ESO: Martes  3º ESO: Mércores  4º ESO e FP Básica: Xoves  1º e 2º Bacharelato: Venres O alumnado de Ciclos Formativos poderá acceder calquera día durante os seus respectivos recreos. O profesorado que propoña libros de lectura recomendada será o encargado do empréstito e recollida na aula en colaboración coa coordinadora da biblioteca.

martes, 23 de junio de 2020

Bo verán e boas lecturas


Non queremos marchar sen antes desexarvos un bo verán cheo de bos momentos e magníficas lecturas, así que vos recomendamos botar un ollo ás guías de verán publicadas por varias bibliotecas escolares galegas.

Pero, sobre todo, non deixedes de escoitar o último programa Especial Fin de curso de Radio Bolboreta, un fermosísimo e moi emotivo programa no que participamos, despedimos aos compañeiros que xa non estarán aquí o próximo curso e que conta con importantes e moi interesantes colaboracións.

Apertas e moita saúde. Vémonos en setembro.

viernes, 15 de mayo de 2020

Letras Galegas 2020


Este 17 de maio está adicado ao escritor Ricardo Carvalho Calero, homenaxeado nestas Letras Galegas 2020. Foi este escritor un gran estudoso da literatura galega, quen destacou polo seu maxisterio, o seu compromiso coa lingua, a súa poesía e o teatro.

Dende o noso humilde recuncho, convidámosvos a adentrarvos no espazo das bibliotecas escolares galegas para saber mais sobre a figura do homenaxeado e a escoitar Radio Bolboreta, que o próximo 17 publica un programa especial no que participamos con gran ilusión e agarimo.

jueves, 23 de abril de 2020

2020: Día do Libro confinado


É a primeira vez que vivimos un Día do Libro confinados xunto cos libros, sen poder mercarlos, agasallalos e compartilos, pero afortunadamente podemos lelos. É a primeira vez que non puidemos estar no noso instituto para poñer en valor a nosa biblioteca, fogar dos nosos libros. Porque cando todo se para, cando case todo falla, sempre temos aí os libros, a nosa casa, a patria á que sempre voltamos en soidade. E en soidade e confinamento atopamos a paz para ler e reflexionar sobre o que os libros nos dicen, porque son coma unha voz interior que nos fala ao ouvido. De aí esta montaxe caseira que nos lembra (en portugués) que non deixemos para mañá o libro que poidamos ler hoxe. Dalle unha oportunidade a ese libriño aparcado no andel. Deixa por un momento as redes sociais, agarra un libro físico e lembra o lema da nosa "Hora de ler": "Dez minutos ao día que ben nos virían"
E dándolle voltas ao tema, a nosa compañeira do equipo de biblioteca Mª Jesús Arcos reformulou algúns refráns e fixo estas divertidas montaxes nas que o libro é o protagonista:

Coidádevos moito, dade unha voltiña polas propostas das bibliotecas escolares abertas e activas de Galicia e estade atentos a Radio Bolboreta, que está a punto de poñer nas ondas un programa especial para o Día do Libro con moitas sorpresas e colaboracións.

martes, 31 de marzo de 2020

Quedamos na casa

Nestes días están a pasar moitas cousas tristes, entre elas a morte de moitas persoas que tanto fixeron durante as súas vidas en moi distintos ámbitos. Non podemos esquecer a Albert Uderzo, un dos creadores de Asterix e Obélix, que tanto nos deleitaron coas súas aventuras. Lembrámolos aquí con esta viñeta de O Carrabouxo, sempre intelixente e inxenioso, e agardamos que confinados tamén poidamos vencer ao virus como Asterix e Obélix aos seus romanos.
Entre tanto, non deixedes de ler, facer as vosas tarefas e escoitar a Radio Bolboreta, que segue activa e facendo programas especiais. Coidádevos moito!

viernes, 6 de marzo de 2020

Mochilas en feminino


Na semana do 8 de marzo, Día da Muller, acaban de saír novamente as mochilas viaxeiras. Esta vez as dúas afortunadas foron as rapazas de 1º de ESO Radka Stanislavova e Débora Yangiva, que posaron así de contentas coas súas mochilas diante do expositor con moitos fondos da biblioteca relacionados co feminisimo e a igualdade. Noraboa!

martes, 3 de marzo de 2020

Traballando de xeito interdisciplinar en torno ao 8M


Na entrada do noso centro temos exposto un gran mural con traballiños feitos polo alumnado de 1º dos Ciclos de Administración en torno ao 8M e a unha das pioneiras galegas que están de celebración: Concepción Arenal.

O alumnado de 1º de Ciclo Medio de Xestión Administrativa traballou cos obxetivos e os retos do 8 de marzo en clase de inglés, facendo uso das destrezas adquiridas durante o obradoiro de Lettering impartido recentemente.



O alumnado de 1º de Ciclo Superior de Administración e Finanzas elaborou uns traballos sobre a obra e figura de Concepción Arenal, da que acabamos de celebrar o bicentenario do seu nacemento. Para isto, traballaron durante o módulo de Ofimática en torno a esta muller e grazas a esta idea da profesora Raquel Leiro, conseguiron saber moito sobre todo o que tivo que loitar como muller discriminada nos tempos que lle tocou vivir. A profesora de inglés e coordinadora da biblioteca Raquel Arias decidiu visibilizar este traballo e aproveitar a ocasión para aprender mais vocabulario en inglés e poñer en práctica a creatividade e o Lettering confeccionando os vistosos carteis que podedes ler. É sempre un pracer montar e expoñer obras coas que tanto aprendemos e que serven de base do coñecemento desde esta nosa biblioteca.





Mais ningunha mostra pode estar completa sen os libros que sempre nos acompañan e nos fan mais libres. Así que ahí queda a mostra de libros adquiridos recentemente en torno á muller, a igualdade e a coeducación.

viernes, 21 de febrero de 2020

O Día de Rosalía, telón de fondo da nova mochileira



Agólpanse as celebracións: Entroido, Día de Rosalía e vacacións. Así que que mellor que lembrar o 24 de febreiro, Día de Rosalía, expoñendo algúns dos seus versos e da súa obra na entrada á biblioteca ao tempo que Samira López Veiga, de 1º de ESO, afortunada coa mochila nos vindeiros quince días, posa así de contenta desexosa de ver todo o que contén. Noraboa e bo descanso!

viernes, 14 de febrero de 2020

Quérote, libro meu!


Sobran as palabras e falta tempo para tan bos libros e películas!

Lettering na biblioteca. Obradoiro de caligrafía creativa


Esta nosa biblioteca é un espazo bule-bule, sempre creativo e sempre dando entrada á imaxinación, a creatividade e á forza da palabra. As palabras están compostas por letras, e as letras son a voz da mensaxe. Así que fai pouco descubrimos os obradoiros de Lettering ou caligrafía creativa. Foron impartidos por Mónica Martínez da empresa viguesa Sopa de Letras e dirixidos ao alumnado de 1º dos Ciclos Medio e Superior de Administración.

O lettering é unha ferramenta persoal que comunica, é expresivo, o autor debuxa, coñece as letras e os distintos alfabetos, estimula a creatividade, leva tempo pero fai que a calma, a concentración e a reflexión veña a ti. É unha actividade realmente enriquecedora en todos os sentidos. Saboreas o proceso e aprendes moito. O alumnado estivo realmente aplicado e colaborador, así que confiamos en ver resultados das súas obras de arte moi pronto.

Graciñas a Mónica por ensinarnos tanto en tan pouco tempo e a todos os aplicados participantes.