Visita do profesorado alemán á nosa biblioteca

 

    Recentemente tivemos o pracer de coñecer a tres profesores do Gymnasium Waldkraiburg: Daniel, Thomas e Michael. O motivo da visita foi, ademáis de coñecer o noso centro, preparar a visita dalgunhas das súas alumnas que terá lugar o vindeiro mes de maio como parte do proxecto Erasmus+.

    Os tres profesores visitantes mostraron gran interese pola nosa biblioteca e todos os proxectos de fomento da lectura nos que estamos inmersos. Foi un encontro moi cordial no que intercambiamos puntos de vista sobre o ensino, a lectura e as distintas formas de traballar nos nosos respectivos centros de ensino.

Arte na biblioteca

 

A nosa biblioteca é ademais territorio das artes, e por iso temos unha nova exposición sobre as mesas da biblioteca, unha selección de obras de arte do Parlamento de Galicia, agasallo desta institución.

Achégase o 21 de marzo, Día da poesía

 

Temos xa no expositor un bo feixe de libros de poesía para ir gozando dela mentres se achega o 21 de marzo, Día da poesía, no que novamente lembraremos ao noso compañeiro Eduardo Rey Moure, quen impulsou a iniciativa de xuntarnos todos os centros da comarca na praza da vila de Sarria para celebrar a poesía. Nesta edición os poemas xirarán en torno á temática da auga e agardamos pasar outra xornada estupenda recitando, cantando, musicando e escoitando poemas en galego.

Premiados no Concurso "Inspírate en Castelao"

 

 A entrega de premios dos concursos celebrarase o mércores 19 de marzo ás 11:10 na entrada do edificio 100.

Ademais, podedes ver os debuxos premiados na exposición da mesa da biblioteca. Afortunadamente temos uns grandes artistas entre o noso alumnado.

23 de febreiro: Día de Rosalía

 Un ano más, o traballo en común para conmemorar o Día de Rosalía fixo que entre todos fixeramos moitas cousas pequenas para conmemorar algo moi importante para todos nós, a figura e a obra da gran Rosalía de Castro. As actividades adaptáronse ao seguinte programa:

No Instagram da biblioteca tedes mais fotos e vídeos destas actividades. 

Entretanto, quedámonos cos bos momentos que pasamos creando, debuxando, xogando e cantando en torno a Rosalía.

2025: Ano Castelao. Exposición e concurso de ilustracións

 

    Este 2025 conmemórase o 75 aniversario do pasamento do gran Castelao, e con este motivo dende o Equipo de Dinamización Lingüística e a biblioteca preparamos unha pequena mostra arredor da súa figura expoñendo as obras dun facsímil das súas ilustracións para o álbum Nós.

    En primeiro lugar, o alumnado tivo que buscar información agochada na biblioteca sobre aspectos relacionados coa vida e obra de Castelao para logo analizar as ilustracións e os comentarios que as acompañan no material exposto nas mesas da biblioteca. Pero o saber non remata aí, polo que ademais todo o alumnado do IES Gregorio Fernández pode demostrar as súas dotes artísticas tomando como inspiración as ilustracións orixinais de Castelao para crear as súas propias, coas que faremos unha nova exposición, na que haberá premios para os mellores. Non te demores, agardamos as vosas obras na biblioteca ata o 7 de febreiro.

Esta exposición coincide no tempo co 30 de xaneiro, Día da Ilustración, elemento tan presente na nosa biblioteca. Sabiades que nestes momentos os libros mais emprestados son determinados libros ilustrados?

Teatro en inglés e paseo polo arte urbán lucense

 

Comezamos o 2025 de xeito activo e cultural, acudindo á obra de teatro en inglés "Derailed" da compañía Face2Face no auditorio Gustavo Freire de Lugo. A continuación, aproveitamos para facer unha visita guiada, tamén en inglés, pola arte urbana presente en moitas paredes de Lugo en forma de graffiti, un tesoro agochado co que adentrarnos en novas manifestacións artísticas. Nesta ocasión, o departamento de inglés organizou a actividade para o alumnado de 3º, 4º de ESO e 1º de Ciclos Formativos, unha experiencia estupenda coa que empezar o segundo trimestre.

"Pilgrim Spirit. Elías Valiña and the Revival of the Camino 1959-1989"

 

A nosa biblioteca acolleu a presentación da edición do libro sobre Elías Valiña do escritor Luis Celeiro, quen estivo acompañado pola traductora canadiense residente no Cebreiro Laurie Dennet co gallo do 35 cabodano de Elías Valiña Sampedro.

O alumnado de 1º dos ciclos formativos de administración e xestión e de mecatrónica industrial puideron coñecer de primeira man a importancia da figura de Elías Valiña na consolidación do Camiño de Santiago. Ademais, puideron escoitar á escritora Laurie Dennet dar o seu discurso en inglés, o cal resultou moi enriquecedor.

Esta actividade foi promovida pola Asociación de Peridistas e Escritores do Camiño de Santiago (Apecsa) e desde o comezo contou coa nosa colaboración. Benvidas sexan as iniciativas que promoven a cultura e a lectura!

Agradecemos ademais os seis exemplares da obra doados e que pasan a formar parte da colección da biblioteca de libros relacionados co camiño de Santiago.

Presentación do libro sobre "Elías Valiña, Valedor do Camiño" en inglés

    Con motivo do 35 cabodano de Elías Valiña, o cura nado en Sarria e que logo foi o cura do Cebreiro que tanto fixo pola promoción e difusión do Camiño de Santiago, a Asociación de Xornalistas e Estudosos do Camiño de Santiago (APECSA) organizou unha serie de actos na súa memoria.

 A nosa biblioteca acollerá a presentación da edición en inglés do libro Elías Valiña, Valedor do Camiño (2007) do autor  Lois Celeiro, que será presentado na biblioteca do noso instituto o próximo 13 de decembro. Contaremos ademais coa súa tradutora ao inglés: Laurie Dennett, polo que será toda unha honra para nós asistir a este evento.

Podedes botar unha ollada ao completo programa de actividades picando en: https://sarriaturismo.com/wp-content/uploads/2024/11/Cartel-Programa-Cabodano-1_compressed.pdf

Aproveitamos a ocasión para mostrar algúns exemplares relacionados co Camiño que temos na nosa biblioteca.

Peticións de Nadal e Nadal multilingüe

 

Xa está aquí o Nadal e como cada ano animámosvos a que pidades cousiñas para a biblioteca antes do 18 de decembro depositando as vosas peticións na urna.

Este curso ademais celebramos un Nadal multilingüe felicitando en todas as linguas que se estudan ou se falan no noso centro.